Herodotus, The Histories (XML Header) [genre: prose] [word count] [lemma count] [Hdt.]. | ||
<<Hdt. 1.198.1 | Hdt. 1.199.3 (English) | >>Hdt. 1.201.1 |
1.199.1
note ὁ δὲ δὴ αἴσχιστος τῶν νόμων ἐστὶ τοῖσι Βαβυλωνίοισι ὅδε · δεῖ πᾶσαν γυναῖκα ἐπιχωρίην ἱζομένην ἐς ἱρὸν Ἀφροδίτης ἅπαξ ἐν τῇ ζόῃ μιχθῆναι ἀνδρὶ ξείνῳ . πολλαὶ δὲ καὶ οὐκ ἀξιούμεναι ἀναμίσγεσθαι τῇσι ἄλλῃσι , οἷα πλούτῳ ὑπερφρονέουσαι , ἐπὶ ζευγέων ἐν καμάρῃσι ἐλάσασαι πρὸς τὸ ἱρὸν ἑστᾶσι · θεραπηίη δέ σφι ὄπισθε ἕπεται πολλή .
1.199.2 αἱ δὲ πλεῦνες ποιεῦσι ὧδε · ἐν τεμένεϊ Ἀφροδίτης κατέαται στέφανον περὶ τῇσι κεφαλῇσι ἔχουσαι θώμιγγος πολλαὶ γυναῖκες · αἱ μὲν γὰρ προσέρχονται , αἱ δὲ ἀπέρχονται . σχοινοτενέες δὲ διέξοδοι πάντα τρόπον ὁδῶν ἔχουσι διὰ τῶν γυναικῶν , διʼ ὧν οἱ ξεῖνοι διεξιόντες ἐκλέγονται ·
1.199.3 ἔνθα ἐπεὰν ἵζηται γυνή , οὐ πρότερον ἀπαλλάσσεται ἐς τὰ οἰκία ἤ τίς οἱ ξείνων ἀργύριον ἐμβαλὼν ἐς τὰ γούνατα μιχθῇ ἔξω τοῦ ἱροῦ · ἐμβαλόντα δὲ δεῖ εἰπεῖν τοσόνδε · “ἐπικαλέω τοι τὴν θεὸν Μύλιττα .” Μύλιττα δὲ καλέουσι τὴν Ἀφροδίτην Ἀσσύριοι .
1.199.4 τὸ δὲ ἀργύριον μέγαθός ἐστι ὅσον ὦν · οὐ γὰρ μὴ ἀπώσηται · οὐ γάρ οἱ θέμις ἐστί · γίνεται γὰρ ἱρὸν τοῦτο τὸ ἀργύριον . τῷ δὲ πρώτῳ ἐμβαλόντι ἕπεται οὐδὲ ἀποδοκιμᾷ οὐδένα . ἐπεὰν δὲ μιχθῇ , ἀποσιωσαμένη τῇ θεῷ ἀπαλλάσσεται ἐς τὰ οἰκία , καὶ τὠπὸ τούτου οὐκ οὕτω μέγα τί οἱ δώσεις ὥς μιν λάμψεαι .
Herodotus, The Histories (XML Header) [genre: prose] [word count] [lemma count] [Hdt.]. | ||
<<Hdt. 1.198.1 | Hdt. 1.199.3 (English) | >>Hdt. 1.201.1 |